सर्वदा वाङ्मय प्रतिष्ठान यूएई शाखाले यही मिति ०५ फरवरी २०१० का दिन यूएईको अबुधाबी स्थित केरला सोसल सेण्टरमा एक अन्तर्क्रिया कार्यक्रम सम्पन्न गर्यो ।

नेपालबाट भर्खरैमात्र आफ्नो कार्यभार सम्हाल्न आइपुगेका नेपाली राजदूतावास यूएईका उपनियोग प्रमुख दीपक अधिकारीको प्रमुख आतिथ्यमा सम्पन्न उक्त कार्यक्रम ज्ञात अज्ञात शहीदहरुको सम्झनामा एक मिनेट मौन धारण गरि शुरुआत भएको थियो । सर्वदा हिजो, आज र भोलि विषयक सो अन्तक्रिर्या कार्यक्रममा आयोजकका तर्फबाट चेतन कार्कीले स्वागत भाषण गरेका थिए भने दीपक अधिकारीले सर्वदा वाङ्मय प्रतिष्ठान यूएईको कार्यपत्र पढेर सुनाएका थिए । कार्यपत्रमा सन् २०१० लाई सर्वदाले साहित्यिक वर्षको रुपमा मनाउने योजना रहेको जानकारी गराइएको थियो भने यसले हिजो गरेका कार्यहरुमाथि प्रकाश पारिनुका साथै यसलाई सहयोग गर्ने व्यक्तिहरुलाई धन्यवाद ज्ञापन गरिएको थियो ।

अन्तक्रिर्याको विषयमा बोल्दै नेपाली दूतावास यूएईका द्वितीय सचिव लोक बहादुर पौडेल क्षेत्री, तमु समाज यूएईका महासचिव डीआर गुरुङ्ग, प्रवासी नेपाली संघ यूएईका अध्यक्ष यमलाल शर्मा पागेनी, लुम्बिनी वेलफेयर सोसाइटीका अध्यक्ष डीएल शर्मा, जनप्रगतिशील मञ्च यूएईका केन्दि्रय सदस्य रमेश बेलबासे, एनआरएन एनसीसी यूएईका केन्दि्रय सदस्य विकास अधिकारी, नेपाली साहित्य तथा सांस्कृतिक परिषद् यूएईका अध्यक्ष गिरधारी 'विरही' रिजाल, कृष्ण जीसी लगायतका बक्ताहरुले नेपाली साहित्य र सर्वदाको बारेमा आ-आफ्नो मन्तव्यका साथ सुझाव दिएका थिए ।

सोही कार्यक्रममा नेपाली दूतावास यूएईको उपनियोग प्रमुखको पद सम्हाल्न आइपुगेका दीपक अधिकारीलाई सर्वदा वाङ्मय प्रतिष्ठान यूएई शाखा र प्रवासी नेपाली संघ यूएईका तर्फबाट उनको कार्यकाल सफल रहोस् भनी फूल गुच्छा दिएर स्वागत गरिएको थियो भने उक्त कार्यक्रममा प्रमुख अतिथिको आसनबाट बोल्दै श्री अधिकारीले आफू भर्खरमात्र यूएई आएको र यहांका संघसंस्थाहरुको बारेमा जानकारी लिदै जाने अनि आपसी सम्बन्ध सुमधुर बनाउंदै लैजाने विश्वास दिलाए ।

निर्धारित समयभन्दा करीब डेढ घण्टा पछि शुरु भएको सो कार्यक्रममा विभिन्न संघसंस्थाका प्रतिनिधि, साहित्यकार र पत्रकारहरुको उपस्थिति रहेको थियो भने कार्यक्रमको अध्यक्षता संस्थाका अध्यक्ष लक्ष्मण सापकोटाले गरेका थिए र सञ्चालन सचिव कृष्ण देवकोटाले गरेका थिए ।